18 сентябрьыште мемнан книгагудын лудшыжо-влаклан «Мый да закон» Лӱдыкшыдымылык правовой школ шке пашажым угыч тӱҥалын. Школысо занятий-влакын программыжым Марий Эл Республикысе МВД-се Следственный управленийын специалистышт дене чоҥымо. Тудын тӱҥ задачыже — кушкын толшо самырык тукым коклаште преступность шотышто профилактикым эртарымаш.

Лӱдыкшыдымылык правовой школын икымше колыштшыжо-влак Т. И. Александрова лӱмеш 11-ше номеран лицейын 8 «Э» классыштыже тунемше-шамыч лийыныт. Нунылан «Уголовный да административный ответственность» лӱман  икымше занятийым эртареныт.

Нормативно-правовой документ-влак негызеш Марий Эл Республикысе СУ МВД-н старший следовательже, юстиций подполковник Рыбакова С. Р.  тунемше-влаклан «административный» да «уголовный» ответственность нерген умылтарымашым пуэн, правонарушенийын тӱрлӧ лиймышт шотышто каласкален.

Ӱдыр-рвезе-влак «илыше» пример ден ситуаций-влакым лончыленыт, ятыр йодышым пуэныт.

Нуно следовательын профессийже нергенат палаш кумылан лийыныт, но тудын ойыртемже нерген вес занятийлаште пален налыт.