Книгагудысо «Vообража­риум» лӱман пӧлемыште йочасадыш коштшо икшыве-влакын «Умничка» модмо клубышт кумшо тургымжо мучашке лишемын. Йоча-влак идалык мучко тиде клубышто модыныт, тунемыныт, усталыкыштым шуареныт. Ынде иктешлымашым ышташат жап шуын. 

«Теҥыз путешествий але кладым кычалмаште» еш пайремышке йоча-влак да нунын ача-аваштым ӱжмӧ. Ава-влак шке ӱдыр-эргышт-шамыч дене капитан Флинт пелен теҥызысе ятыр чарак гоч эртеныт, викторине да конкурслаште участвоватленыт.  

Риф кокла гоч ийын кайышыла, путешественник-влак, отролашке шогалын, пиратын тӱрлӧ заданийжым шуктеныт. Чыла чарак гоч эртымек, йоча-влак кужун вучымо поян кладым муыныт — «Умничка» клубым эртыме нерген сертификат да шарнымаш пӧлек кажне йочалан логалын.
Еш пайремыш толшо кажне еҥ весела кумыл дене вес кеҥеж марте чеверласен. У тунемме ийыште клуб шке омсажым чыла кумылан-влаклан угыч почеш. 

---