«Книга – воштончыш, чӱчкыдынрак тушко ончал».

Калыкмут

 Таче книга шӧрлык-влак ятыр у сылнымут дене пойдаралтыныт. Шуко книга кокла гыч сайракшым кузе ойырен мошташ? Самырык лудшо ден кӱлешан книгам кузе ваш ышташ? Кызытсе автор-влакын сай книгашт дене палдараш манын, книгагудышто «Сай книган шагатше» обзор-презентаций лийын. 

Ик шагат жапыште Торгово-технологический колледжын студентше-влак кызыт книгагудылаште да Интернетыште могай  автор ден книга-влак кумдан лудалтыт — пален налыныт. Тӱҥалтыште тунемше-влак дене «Молан книгам лудаш кӱлеш» лӱман видеофрагмент почеш мутланымаш лийын. Вара отечественный да мировой классик-влак: Р.Брэдбери, Э.М.Ремарк, Д.Сэлинджер, М.Булгаков да молынат книгашт-влакым шарналтышт. Кызытсе сылнымутын аторыштат мемнам шонаш таратат, уш-акылнам пойдараш полшат. Автор-шамыч Д. Сабитова, Т.Михеева, О.Громова, Э.Файн, Дж.Грин, Э. Веркин, В.Крапивин, Н.Васильева, И.Дегтярева, А.Никольская, Аи Эн  да молат кызыт лудшо-влак коклаште кумдан чапланеныт. Элнан историйжылан пӧлеклалтше у книга серий-влак  «Как это было» (В.Сёмин «Ласточка-звездочка», Б.Окуджава «Будь здоров, школяр», В. Шефнер «Сестра печали») да «Наши ночи и дни для Победы» (А.Приставкин «Кукушата, или Жалобная песнь для успокоения сердца», В. Инбер «Почти три года: Ленинградский дневник» да молат) книга шӧрлыкым пойдараш полшат. Книгагудо пашаеҥ ден тунемше-влак коклаште сылнымут произведений нерген тыгай вашмутланымаш лудмо кумылым луктеш да у автор дене палыме лияш тарата.

Книгагудыш чыладам пагален вучена!

Тек тендан каныш жапдам у да оҥай книга-влак сӧрастарат.

---