Loading ...
ХХ-шо курым тӱҥалтыште писатель Максим Горькийын лӱмжӧ Л. Толстой да А.Чеховын лӱмышт дене тӧр шындалтын, кеч Горький нунын тунемшышт веле лийын. 1900-ше ийла тӱҥалтышыште тиде писательын произведнеийже-влак икмыняр шӱдӧ тӱжем экземпляр дене савыкталтыныт. Тудын дене ятыр еҥ келшымашым кычалын: меркалыкын лӱмлӧ айдемышт, тале литератор-влак В.Г. Короленко, Н.К. Михайловский, А.Ф.Кони, П.Н. Милюков, П.Б. Струве 1899 ийыште самырык писатель лӱмеш Петербургышто банкетым ыштеныт, тудым уремыштат шукын паленыт. Вес эллаште Стефан Цвейг, Ромен Роллан, Марк Твен тудлан сай акым пуэныт. Тений Максим Горькийын шочмыжлан 150 ий. Тиде лӱмгечылан пӧлеклалтын «Тӱняште Айдеме лияш» кас-портрет.
Мероприятийыш Йошкар-Оласе аграрный колледжын студентышт ден 9-ше номеран школын тунемшышт толыныт. Нуно М.Горькийын илышыж да творчествыж дене лишкырак палыме лийыныт. Писательын илыш умлымашыжым, тудын кӧргӧ чон поянлыкшым тачат ме тушто семын ончена. Тидымак палемдышт толшо уна-влакат. Тунемше-шамычлан поян материалан мультимедийный презентацийым ончыктымо.
Максим Горький — руш да пӱтынь тӱнясе саманым символизироватлыше еҥ. Горькийын личностьшо сылнымут илышыште таче кечынат рӱдӧ верым налеш. Тидымак ойлат писатель нерген лекше ятыр у книга-влак, кудышт «революцийын буревестникшым» тӱрлӧ могыр гыч шымлен каласкалат.
Ученыйын илышыже — тудын ала-мом ум шонен лукмыжо, сӱретчын илышыже — тудын радынаже, писательын илышыже — тудын книгаже-влак. Садлан М.Горькийым лишкырак пален налнеда гын, лудса книгам. Кеч-мо гынат Горький тӱнямбалне ик эн палыме руш писатель семын кодеш.
