Поэзий кумылан еҥлан
Йӱржат ок ыште лавырам,
Лумат ок петыре йолгорным.
Поэзийлан кеч-кушто — корно…

Поэзий – айдеме тукымын ик эн кӱкшӧ сеҥымашыже, очыни. Шонымашым почеламут корнылашке пыштен, рифмылашке кумылым велен, ончыклыкым шонен да эртышым шарнен, миллион еҥ деке шуктен да тыгодымак шке кумылет пелен кодаш — тидым лач поэзий гына ыштен кертеш. 21 мартыште, Поэзийын тӱнямбал кечынже, ме шке лудшына-влаклан куанле пайремым пӧлеклышна: книгагудын ончер пӧлемыштыже марий поэтессе, МАССР-ын сулло туныктышыжо Зинаида Васильевна Ермакова дене творческий вашлиймашым эртарышна. Тиде авторым ме «Садеран рвезылык», «Садеран корнывожышто», «Чоя Марусь», «Тек куржыт ий-влак»  книгала гоч палена.

Зинаида Васильевна 1946 ий 28 сентябрьыште Шернур район Кожласолаште шочын. Марисола школым тунем лекмек, Н.К. Крупская лӱмеш Марий кугыжаныш педагогический институтын студенткыже лиеш. Вуз деч вара самырык туныктышо ондак Мустай школышто марий йылме ден литературым туныкта, а вара шочмо школышкыжо толеш. Тыштат тунемше-влакым шочмо йылмылан кумылаҥда. З.Ермакован тыршымыж дене поэт, киноактер Йыван Кырлалан пӧлеклалтше тоштер почылтеш. Туныктышын поро пашажым тачат умбакыже шуят: школышто «Ший оҥгыр» да «Факел» газет-влак лектыт.

Поэзий пайремыш Марий кугыжаныш университетын студентышт толыныт ыле. Нуно З. Ермакован почеламут йолважым кумылын рончышт, поэзийжылан акым пуышт. Поэтессе ӱдыр-рвезе-влаклан шке илышыж ден творчествыж нерген каласкалыш, тӱрлӧ оҥай тат-влакым шарналтыш, вет тудо эше — тале краевед, колым кучышо, поҥгым погышо…

Вашлиймашнан шерге унаже поэтессе Альбертина Иванова пӱртӱс дене чак кылдалтше З.Ермакован поэзий ойыртемжым палемден кодыш да кӱкшӧ акым пуыш. Пайремыш Зинаида Васильевнан йолташыж ден палымыж-влак, «Марий Эл» газет, радио ден телевидений гыч журналист-шамыч толыныт. Ме чыланат тиде вашлиймаш гыч сай кумылым налын, поэтессылан тауштен, тудлан тазалыкым, у сеҥымашым тыланен кодна.

---