Шошын икымше кечынже Пырыс-влакын тӱнямбал кечышт палемдалтын. Тидын лӱмеш мемнан книгагудыштына «Книга комышто — пырыс-влак» лӱман весела шагат эртен. Тушто «Шонанпыл» йочасадысе икшыве-влак лийыныт да пырыс нерген шуко оҥайым пален налыныт. Историйым шергалын, теве мом пален налме: тӱрлӧ пагытыште тӱрлӧ эллаште пырыс нерген тӱрлӧ семын шоненыт: кӧ гын тудым пеш пагален, а кӧ гын явыллан шотлен. Ӧрмаш: пырыс-влак ала-кунамже тӱрлӧ профессийланат тунемыныт. Мутлан, пырыс-артист, тоштерым, книгагудым аралыше пырыс, эсогыл пырыс-салтак-влак айдеме дене пырля сӧй пасушто кучедалыныт. Пырыс-влакын пайремышт вашеш книга ончерым сӧрастарыме. Тушто пырыс дене кылдалтше йоча книга ден журналлам вераҥдыме. Ончер дене йоча-шамычым книгагудо пашаеҥ-шамыч палымым ыштеныт. А эше 28 номеран школышто тунемше Козлова Кристинан презентацийже чылалан моткоч келшен. Тудо тӱрлӧ породан пырыс нерген веле огыл, тыгак шкенжын йӧратыме пушкыдо пунан пырысшын илышыж  нергенат каласкален.

Мероприятий мучаште йоча-влак деке пайрем уна — пырыс — толын! Тыглай огыл, а «книгагудысо». Тудо икшыве-влаклан пырысым сӱретлыман закладке ден открыткым ыштыме мастар классым эртарен.

Тыгай оҥай вашлиймаш деч вара кажне йоча пырысан лияш кумылаҥын, очыни!

---