22 февральыште В.Х.Колумб лӱмеш республикысе йоча да самырык-влаклан книгагудышто «Книгагудо да самырык тукым: иктешлымаш, ончыклык паша» семинар-совещаний эртен. Тушко Марий Эл Республикысе рӱдӧ да межпоселенческий книгагудо пашаеҥ-влак погыненыт. Нуно эртыше 2017 ийысе пашам иктешленыт, шке паша опытышт дене палдареныт.  

Семинарын пашажым книгагудын вуйлатышыже Ерпылёва Е.А. почын. Тудо библиотечно-информационный пашаште у кӱкшытыш шуашлан специалист-влакын профессиональнвй стандартыштым тӱҥ негыз семын ончаш тыланен. Тыгак Екатерина Аркадьевна Волжский районысо Рӱдӧ книгагудо системын вуйлатышыже Кузнецова Римма Петровналан «Символы России» Всероссийский литературно-географический конкурсым эртарымыжлан Таумутым кучыктен.

Аналитика да инноваций пӧлкан специалистышт 2017 ийыште самырык тукым дене ыштыме пашам иктешленыт, волонтёр-влакым книгагудо пашашке ушаш манын, методический темлымашым пуэныт.

Параньга ден Морко поселкыласе, Волжск оласе рӱдӧ книгагудо специалист-влак Экологий ийыште ыштыме пашашт, самырык-влаклан тӱрлӧ акцийым эртарыме опытышт, кушкын толшо тукымым шуарымаште  краеведенийын верже нерген мутланеныт.

В.Х.Колумб лӱмеш книгагудын специалистышт тӱрлӧ квестым эртарыме нерген, справочно-библиографический пӧлкан пашаж нерген каласкаленыт.

Семинар-совещанийыш погынышо-влак тыгай вашлиймашлан кугу акым пуэныт. Нуно палемденыт: тыште налме увер-влак — ончыклык пашам виктарымаште кугу полыш.

---