Тый ончык ӱж, атакышке наҥгае,

Йӧратыме поэзий йолташем!

Тений Марий АССР-ын Калык поэтше Миклай Казаковлан 100 ий темын. Тиде чапле лӱмгече вашеш краеведений да периодике пӧлкаште Н.И.Казаковын илышыж ден творчествыж нерген каласкалыше книга ончер ышталтын. Талантан поэт ӱмыржӧ мучко сылнымут мастарлык верч тыршен, тӱнямбалсе поэтике тӱвырам лым лийде шымлен шоген. 

Миклай Казаков —  Марий АССР-ын калык поэтше, СССР Госпремийын лауреатше.  Тудо 1918 ий 15 январьыште Морко район Кӱчыкэҥер ялыште шочын. Николай Иванович шымияш школышто тунемме годымак возаш кумылаҥын. Икымше почеламутшо  1933 ийыште «Пионер йӱк» журналыште савыкталтын. 1938 ийыште «Почеламут-влак» лӱман икымше сборникше лектын. 1940-ше ийыште  «Отважный комсомол» ден «Илаш весела» книга-влак ош тӱням ужыныт. Сар ийлаштат «Тул коклаште» да «Мемнан уремыште пайрем» поэтический сборник-шамыч марий сылнымутым пойдареныт. А 1950 ийыште Москосо  «Советский писатель» савыктыш М.Казаковын «Поэзия — любимая подруга» лӱман книгажым луктеш. Лач тиде савыктышлан Н.И.Казаков 1951 ийыште  III степенян Сталинский премий дене палемдалтын. Марий сылнымутын историйыштыже тыгай кӱкшытан премийым налше тетла лийын огыл. Поэтын почеламутшо-влакым мемнан элысе ятыр йылмыш, тыгак моло элласе шуко йылмылаш кусарыме.

 Ончер дене палыме лияш да Миклай Казаковын творчествыжым уэш шергалаш уло кумылын ӱжына!

---