Элнан ик эн шнуй пайремже – Сеҥымаш Кече — лишемеш. Тиде — кугезе-влакын геройлыкышт дене кугешныме кече. 9 Май деч ончыч книгагудышто «Йоча-влакын шинчашт дене патриотизм Азбуко» шкешотан ончерым почмо. Проектын икымше участникше 15-ше №-ан кыдалаш школышто 5-7 класслаште тунемше-влак лийыныт. Рвезе-влак творческий задачылан уло кумылын пижыныт: алфавитын кажне букважлан нуно геройло кредалмаш нерген темым ойыреныт, тудлан ныл корнан почеламутым келыштареныт да иллюстрацийым ыштеныт. Тыге кажне буква посна историйыш савырнен – Кугу Отечественный сарын подвигше гыч Тӱҥалын, таче Шочмо элым аралыше-влакын лӱддымылыкышт марте. Йоча сӱрет да почеламут гоч элын эрыкшым арален кодышо да тудын верч таче кредалше-влакым шарнымаш почылтеш. Тиде инициативын келге историй вожшо уло. 1942 ийыште СССР-ыште «Сеҥымаш Азбука» ышталтын, а Кугу Сеҥымашлан 80 ий темме вашеш Марий Элысе Калык фронтын активистше-влак «СВО Азбукым» ямдыленыт. Тыгай проект-влак у тукымлан ожнысо да кызытсе событий-влакым искусство да мут гоч умылаш полшат. Выставкыште калык фронтын исполкомжым вуйлатыше Валентин Валерьевич Севастьянов, Калык фронтын штаб членже Коптелин Владимир Николаевич , школышто воспитательный паша шотышто советник Владимирова Елизавета Андреевна, тыгак проектын авторжо Капелькина Ольга Григорьевна лийыныт. Уна-влак инициативын кӱлешлыкшым палемденыт. Тиде ончер — тыглай экспозиций огыл, а илыше урок. Эртыше илыш нерген чыным арален кодымаш — мемнан порысна.
Ончерыш книгагудын паша ыштыме жапыштыже толаш лиеш.
Калыкын подвигшым у тукымын шинчаж дене ужнеда гын, толза мемнан деке!
