Кажне ийын 1 декабрьыште СПИД ваштареш кучедалме кече палемдалтеш. Тыгай темлымашым икымше гана Тӱнямбалсе тазалык аралтыш организаций ыштен. Тудым 140 эл  сайлан шотлен. ВИЧ деке тыгай тӱткылык арам огыл лийын: Тӱнямбалсе тазалык аралтыш организацийын палемдымыж почеш, мландӱмбалне 37 миллион утла айдеме шучко чер дене ила.

Мемнан книгагудыштына «Ончыклык — СПИД деч посна» самырык тукым акцийым эртарымаш поро йӱлаш савырнен. Тудын участникше 14 ий деч кугурак ийготан самырык еҥ лийын кертеш. Тений мемнан дек Торгово-технологический колледжын тунемшышт-влак толыныт ыле. Акцийын тӱҥ шонымашыже — XXI-ше курымын шучко черже ваштареш кучедалме проблеме дек еҥ-влакым мелын савыраш.Акций эртыме жапыште йоча-влак СПИД нерген у информаций дене палыме лийыныт,  «Спортклуб №1» фитнес рӱдерын профессиональный тренерже дене вашлийыныт. А эн тӱҥжӧ — кажне участник чер шотышто шке шонымашыжым ойлен кертын але специалист деч кӱлеш  вашмутым налын.

---