Марий йоча фольклор – марий калык ойпогын ойыраш лийдыме ужашыже. Курымла дене вияҥ толмо семын, тудо кушкын толшо тукымым воспитатлымаште кугу верым налеш.

Марий калык ожнысек шке икшывыжын модышыж деке тӱткӧ лийын да шкежат модмаште  ӧрдыжеш кодын огыл. Вет тӱрлӧ модыш  дене модын, йоча шочмо  калыкшын тӱвыражым, йылмыжым, чон поянлыкшым келгынрак шижаш тӱҥалеш. Марий модышлаште шуко мыскара, тӱрлӧ койдарчык вашлиялтыт. Нуно весела, проста да кажне икшывылан умылаш йӧршӧ улыт.

Марий калык модыш-влак вес калык-шамычын модышыштымат ушештарат. Туге гына нунын шке ойыртемышт уло. Мутлан, модыш-влак марий сем дене чот кылдалтыныт. Тыгодым модыш веселарак лийже манын, сем ӱзгар дене шоктеныт.

В.Х. Колумб лӱмеш книгагудышто «Модыш, мыскара, койдарчык» фольклор пайрем эртен. Тушко 37-ше номеран «Красная шапочка» йочасадын икшывыже-влак толыныт. Изи уна-шамыч шуко марий модыш дене модыныт, туштым туштеныт, писылудыш-влакым лудыныт. А мучашлан марий такмак-влак почеш марла тавалтеныт.

 

---