«Леве кече» социальный проект негызеш Йошкар-Олаште «Шӱртӧ дене тӱня мучко» поро паша акций тӱҥалын. Тудо ача-ава деч посна кушшо йоча-влаклан полшымо амал дене эрта.
19 ноябрьыште «Леве кече» усталык вашлиймашыште ашнаш налше еш-влакын «МариЯ» лӱман Ассоциацийже гыч кумылан еҥ-влак пледлан квадратым пидаш туныкташ тӱҥалыт. Мыланна меж шӱртым, акрил шӱртым пӧлек шотеш пуаш кумылан-влак лектыт  гын, кугу таум ыштена.

Чылан палена: эн шерге шокшо — чон шокшо. Тудым ме пырля ыштена да весе денат пайлена. Крючок дене пидме квадрат форман меж лаштык-влак погымо пледын ужашышт лийыт. Шокшо плед иктаж тулык икшывылан йоча пӧрт гыч у ешыш кайымыж годым пӧлек шотеш пуаш манын ышталтеш.

💕 «Шӱртӧ дене тӱня мучко» поро акцийыш ушнаш теве мом ыштыман:

☀ Мӧҥгыштӧ улшо шапаш шӱртӧ мундырам пӧлеклаш
☀ Шӱртӧ мундырам налаш да погымо  пунктыш кондаш
☀ Шкегыч крючок дене  15×15 квадратым пидаш
☀ Акций нерген шке йолташлан каласкалаш
☀ Социальный сетьлаште репост дене пайлалташ
☀ Шӱртым погымо сомылым пашаште, техникум ден вузлаште организоватлаш

💕 Шӱртым але пидме квадрат-влакым тыгай адресла дене погат:

⛳ Йошкар-Ола, Красноармейский ур., 78 / И. С. Палантай лӱмеш республикысе тӱвыра да сымыктыш колледж  / гардероб
⛳ Йошкар-Ола, Эшкинин ур., 10 / В.Х. Колумб лӱмеш республикысе йоча да самырык-влаклан книгагудо / гардероб

Йолташ-влак, мемнан дене пырля поро пашашке ушныза. Чыла йодышым организатор-влаклан 40-11-35 телефон дене пуаш лиеш.

Акцийын организаторжо: Марий Эл Республикысе РОО «Ассоциация приёмных семей «МариЯ»

🎉 Мемнан дене пырля ыштыза! Шкегыч ыштыза! 👪

---