Адак толын лектым ты верыш,

Мондалтдыме ӱмыр аҥаш,

Игече тайнен шыже велыш,

Ийгот кӱшта чонлан айнаш.

Но мый толынам шошо мландыш,

Пӱртӱсшӧ — латшым ияш гай.

Тора жапын сынже — ош ландыш,

Йоҥга оҥгырлаже лыжган.

З.Дудина.

16 ноябрьыште В.Х.Колумб лӱмеш Республикысе йоча да самырык-влаклан книгагудышто кумдан палыме поэт Зоя Дудина дене творческий вашлиймаш эртен. Тудо Зоя Михайловнан чапле лӱмгечыжлан да «Доля земная» книга презентацийжылан пӧлеклалтын.

З. Дудина — 11 поэтический сборникын авторжо, редактор, журналист, кусарыше, Российысе, Эстонийысе, Финляндийысе сылнымут премий-влакын лауреатше, Марий Эл Республикысе тӱвыран сулло пашаеҥже. Касым книгагудо вуйлатыше Е. А.Ерпылева почо, тудо Зоя Михайловналан мемнан книгапӧрт дене пеҥгыде кылым кучымыжлан тау мутым ойлыш. Вашлиймашыш  «Доля земная» книгам кусарыше поэт-влак Александр Коковихин, Геннадий Смирнов, Герман Пирогов, тыгак сборник дене тыршен пашам ыштыше редактор, дизайнер, фотограф толыныт ыле. Зоя Дудинан поэзий ойыртемже нерген  филологий  наука доктор Р.А.Кудрявцева ойлыш. Сылнымут пайремыште  поэтессе лӱмеш ятыр поро шомак йоҥгалте. Тудым саламлаш шуко йолташыже, коллегыже, родо-тукымжо толыныт ыле.

Уна-влаклан Зоя Дудинан мутшылан возымо Сергей Маковын музыкальный композицийжым темлыме. Тудым Э.Сапаев лӱмеш опер да театрын артисткыже  Эльвира Курай ден Марий АССР-ын да Россий Федерацийын сулло артистше Виталий Шапкин йоҥгалтареныт. Тыгак книгагудо пӧлемыште З.Дудинан илыш ден творчествыжлан пӧлеклалтше  Д.Речкинын фотоончержым да  книга выставкым  ыштыме.

---