2017 ий 16 ноябрьыште В.Х.Колумб лӱмеш Республикысе йоча ден самырык-влаклан книгагудышто марий  поэтессе Зоя Дудинан  «Доля земная» рушла лекше  книгажын презентацийже лиеш.

Зоя Михайловна — 11 поэзий книган авторжо, М.А.Кастрен лӱмеш сылнымут премийын лауреатше (2000, Финляндий),  «Марий Элын идалыкысе книгаже» конкурсын лауреатше (2006), Марий Эл Республикысе тӱвыран сулло пашаеҥже (2000), Россий писатель ушемын еҥже ( 2002 ий гыч). Поэтессын почеламутшо-влакым финн, эстон, венгр, лив да моло  йылмылашке кусарыме. Тудо тӱрлӧ йылмыласе  сылнымут произведений-влакым марий йылмыш ятыр кусарен да кызытат тиде пашалан шуко вийым да жапым ойыра.

Зоя Дудина тӱрлӧ  жанран почеламутым серыме дене ойыртемалтеш. Тудын творчествыштыже чыла гаяк лирический жанр ден формо-влак вашлиялтыт:  сонета, муро, элегий да т.м. З.Дудинан поэзийыштыже ойыртемалтше жанр семын кумалтыш мут дене возымо почеламутшо-влакым шотлыман. Авторын сылнымут пашаже кызытсе  марий литературыштына кӱкшӧ да кумда верым айла. Илышын шере-кочыж нерген шонкален, поэтессе лирический геройжо-влак дене пырля куана, шортеш, йӧрата…

Марий поэзийын поро йолташыже-влакым Зоя Дудина дене творческий вашлиймашыш пагален ӱжына. Тудын у книгаж дене палыме лияш сай йӧн уло!

 

---