26 октябрьыште книгагудышто  «Лудаш жап»  XII-шо Самырык тукым лудмаш эртен. 2017 -ше ийын темыже  – «Книгагудо да лудшо: ваш толкын». Мероприятийыште МарГУ-со Р. А. Панова лӱмеш научный книгагудын пашаеҥышт-влак, Йошкар-Ола ден Волжск олаласе , Волжский, Курык марий, Звениговский, Килемарский, Куженерский, Мари-Турекский, Медведевский, Моркинский, У Торъял, Шернур, Советский муниципальный район-влак гыч йоча да самырык тукым дене пашам ыштыше специалист, тыгак студент-шамыч погыненыт ыле.

Саламлымаш мут дене  Тӱвыра, печать  да калык-влак паша шотышто министрын алмаштышыже  А. М. Одинцов выступатлен. Тудо книгагудын йоча ден самырык тукым дене пашам ыштыме кылым эреак уэмден шогаш кӱлешлан шотлен. Форумым почмо годым книгагудын директоржо Е. А. Ерпылёва палемден: таче самырык еҥ шагал огыл лудеш, но тидым вес семынрак ышта . Лудшын могай книга деке кумылан улмыжым палаш да тудын йодмыжым шукташ тыршаш кӱлеш.

Вашлиймашын участникышт-влак лудмаш деке кумылаҥдыме тӱрлӧ проект ден методике-шамыч дене вашла палдареныт. Йоча книгагудылашке волонтер-влакым ушымашым сай пример семын палемденыт.

Доклад дене выступатлымышт годым Лудмашын участникышт-влак кызытсе технологий дене кумдан пайдаланымыштым ончыктеныт. Книгагудо пашаеҥ-влак мемнан библиотекын паша опытышт дене палыме лийыныт. Мемнан книгагудо —  «Валентин Колумбым лудына» I республиканский акцийын организаторжо. Акцийын тӱҥ задачыже —  талантан поэт-новаторын творчествыжым книгагудо-влак коклаште шарен колташ да краеведений дене кылдалтше сылнымут деке лудшым шӱмаҥдаш.

 

Профессиональный вашлиймаш — тиде книгагудо ден лудшо коклаште сай кылым ыштымаш, йоча ден самырык тукымым книга деке шӱмаҥдымаш.

Мероприятий гыч фото-влакым Галереейыште ончаш лиеш Самырык тукымын XII-шо лудмашыже 26.10.2017

---