2025 ийыште ме Кугу Отечественный сарыште Сеҥымашлан 80 ийым пайремлаш тӱҥалына. Тиде кече калыкын патырлыкшым, пеҥгыдылыкшым да икоян улмыжым ончыктышо семын курым мучко шӱмыштына лиеш. Жап эрта, сарым шке шинчаж дене ужшо еҥ шагалрак да шагалрак кодеш. Но шарнымаш эре ила. Историй шарнымашым арален кодымо, Кызытсе йоча-влаклан Кугу Отечественный сарысе геройло событийлам шарнаш, кугезе коча-кован подвигше дене кугешнаш  сар нерген лудмо конкурс полша.

Сеҥымаш кече вашеш ынде луымшо гана книгагудышто  «Могай сай тӱняште сар дечын посна!» X-шо Республиканский лудмо конкурс эрта. Кажне лудмо корно тукым кылым ышташ полшышо йӧн.  

Молгунамсе семынак, конкурс самырык талант-влакым уло республик мучко пога: Йошкар-Оласе да Марий Эл Республикысе школышто тунемшым, кыдалаш да кӱшыл шинчымашым налше студент-влакым.

Конкурс ийгот шот дене кум категорий коклаште эрта:

• «1-4 класслаште тунемше-влак»;
• «5-8 класслаште тунемше-влак»;
• «9-11 класслаште тунемше, кыдалаш да кӱшыл шинчымашым налше студент-влак».
•  Конкурсым эртарыме жап:  2025 ий 6 май.

Конкурсым эртарыме вер: В.Х. Колумб лӱмеш Республикысе йоча да самырык-влаклан книгагудо.

Тӱҥалеш 10.00 шагатлан.

Рашрак конкурсын Положенийыштыже

Конкурсышто участвоватлаш  ончылгоч регистрацийым 2025 ий 30 апрель марте эртыман.