Лӱдыкшыдымылыклан пӧлеклалтше месячник негызеш книгагудышто «Лӱдыкшыдымылык школын» модыш занятийже-влак эртеныт. Тушто «Шонанпыл» Православный йочасад гыч икшыве-влак да Бауман лицейын 7 «б» классыштыже тунемше-влак лийыныт. Тунемше-шамыч Нина Павловна Иванова дене вашлийыныт. Тудо  – Утарыше-влакын Всероссийский студенческий корпусысо региональный пӧлкам вуйлатыше.

Тудо тунемше-влаклан пожар годым, корнышто, чодыраште  шкем кузе кучаш, тыгак информационный лӱдыкшыдымылык нерген каласкален. Н. Иванова палемден: лӱдыкшӧ ситуацийыште эн ондак шкемым тыматлын кучаш тыршыман, вара 112 номер дене йыҥгыртыман да утарыше-влак деч полышым йодман.

Нина Павловна «шӧртньӧ шагатын правилже» нергенат каласкален. Тиде жапыште туткарыш логалше еҥлан кӱлеш полышым пуышаш улыт. Тыгак тудо йоча-влакын йодышыштлан вашештен. Неле ситуацийыш логалме татым интерактивный формо дене модын ончыктымо. Пытартышлан ӱдыр-рвезе-влаклан пожарныйын вургемжым висен ончаш йӧным пуэныт.

---