Марий писатель да поэт, Кугу Отечественный сарын участникше Алексей Тимофеевич Январевлан книгагудышто «Лаж вел мурызо» книга ончерым чумырымо.

Книга шӧрлыклаште поэтын илыш да творческий корныж нерген каласкалыше савыктыш-влакым вераҥдыме, Лудшо-влаклан поснак  поэт да кусарыше Г. Пироговын «Спасибо мертвым, вырастившим нас!» статьяже оҥай лиеш, шонена. Тушто А. Январёвын илышыж нерген ятыр у шӧрын ончыкталтын. Тудын поэзий жанр ойыртемже нерген «История, культура и культурология Марийского края» книгасе паша каласкала. Алексей Тимофеевичын «Шонанпыл», «Шӧртньӧ пагыт», «Лӱмнам палыза» книгаже-влакымат ужаш лиеш.

Январёв — поэт-лирик, тудын произведенийже-шамыч шочмо верын моторлыкшым сӱретлат, военно-патриотический тематикан улыт, спорт да пашаче калыкым моктат. 1964 ийыште Марий книга савыктыш тудын «Ош пеледыш» сборникшым луктын. Автор йоч-влакланат возен, тудын пашаже-влак «Ончыко», «Пионер йӱк», «Кече» журналлаште савыкталтыныт.

Уста поэтын творчествыж дене палыме лияш ӱжына!

---