Мемнан книгагудыштына марий поэтессе Альбертина Иванова дене творческий вашлиймаш эртен.

Марий лудшылан тудын поэзийже моткоч лишыл да палыме. Литературовед С. Чеснокован палемдымыж почеш, А. Иванован мурпашаже яндар да раш йӱкан, лирический геройжо чыным кычалше, илышым йӧратыше. Поэтесса ятыр жапым кусарыме пашалан ойыра. А.П.Иванова — Олык Ипай лӱмеш кугыжаныш премийын лауреатше, Марий Эл Республикысе сымыктышын сулло пашаеҥже. 

Вашлиймашыш Йошкар-Оласе 7-ше ден 29-ше номеран школлаште тунемше-влак, нунын ача-авашт, Йошкар-Оласе Куженер район землячествын вуйлатышыже В.А.Прокопьев толыныт ыле. Нунылан А.Иванован илыш ден творчествыж нерген каласкалыше мультимедийный презентацийым ончыктымо. Тыгак книга ончерым сӧрастарыме.

Альбертина Петровнан каласкалымыже, почеламут-влакым лудмыжо чылалан пеш келшен. Тудо ятыр йодыш-влаклан уло кумылын вашештен. Поэтесса дене вашлиймаш йоча-влаклан оҥай да пайдале лийын.

---