Российысе мотор пӱртӱсым аралымаш — Экологий ийын кӱлешан задачыже. Самырык лудшына-влак йырым-йырысе пӱртӱсым аралаш тунемышт манын, книгагудына тӱрлӧоҥай да кӱлешан программым темла. 15 пургыжышто йомак пӧлемыште изи йоча-шамычлан «Йол, поч да шулдыр» экологий модыш эртен.

Мланде — кушкыл, янлык да айдемын кумда кугу пӧртшӧ. Пӱртӱсыштӧ ятыр ӧрыктарыше, шкешотан событий-влак лиедат. А пӱртӱсна — кугу поянлык. Тидын нергенак мутланеныт 76-шо номеран йочасадыш коштшо икшыве-влак.

Йоча-влак янлык кышам, нунын йӱкыштым палаш тыршеныт. «Полшышо поч» электрон презентацийым ончен, янлык тӱнясе  тӱрлӧ оҥай факт-влакым пален налыныт. Тыгак «Янлык зарядке» физкультминуткышто модыныт, «Йомак чодырасе йолгорнышто» парня дене модмо спектакльым ужыныт, «Шулдыр, йол да поч» мультфильмым онченыт. Экологий модышышто участвоватлымеке, изи йоча-влак сайынак умыленыт: пӱртӱс да айдеме чак кылдалтыныт. Садлан пӱртӱс поянлыкым аралыме дене ме шочмо вернам аралена.

---