Мотор шыже кечын книгагудыштына Российын сулло артисткыже, Марий Элын калык артисткыже Маргарита Медикова дене вашлиймаш эртыш. Тудо М.Шкетан лӱмеш национальный драме театрыште ятыр ий модеш да ынде шукертак калык пагалымашым сулен. 

Вашлиймашыш И.С.Палантай лӱмеш тӱвыра да сымыктыш колледж пеленсе Калыклк гимназийын тунемшышт, тыгак Марий кугыжаныш университетын студентышт толыныт. Нунылан чылажат оҥай лийын: кузе усталык шуаралтеш, могай лийшаш чын артист, кулис шеҥгелсе илыш могайрак? Пагалыме уна ятыр йодышлан вашмутым пуыш, шуко ой-каҥашым каласыш, спектакль гыч ужашым модын ончыктыш, почеламутым лудо. Вашлиймаш мотокоч поро шӱлыш дене эртыш.

---