Ленинград блокадын тӱҥалмылан 80 ий эртен. Элнан тиде ойган кечыжлан мемнан книгагудышто «Ленинград блокадын геройло лаштыкше» шарнымаш шагат лийын. Тушко 1-ше номеран школысо 9 классыште тунемше-влак толыныт ыле. Йоча-шамыч кужу да неле 872 кече нерген пален налыныт. Вет тиде пагыт моткоч шучко лийын. Но шужымым да ярнымым ончыде, совет айдеме пашам ыштен да геройла кредалын. Йоча-влак кумдан палыме «Илыш корно» нерген колыштыныт, вет вичкыж ийым да лӱйкалымашым ончыде, олашке кочкышымат, медикаментымат шупшыктеныт. Ӱдыр-рвезе-шамыч поснак ленинградка Таня Савичеван дневникше нерген историйым тӱткын колыштыныт. Нунын таҥаш икшыве-влак пӧрт ӱмбак логалше зажигательный бомбым йӧрыктылыныт, илалше-влаклан полшеныт, кугыеҥ дене пырля заводлаште тыршеныт. Йоча-влаклан тиде шарнымаш шагат эше ик гана ушештарен: Кугу Отечественный сарыште лийше Сеҥымаш совет айдемылан пеш кугу ак дене толын.

---