2021 ийыште Российыште руш князь Александр Невскийын шочмыжлан 800 ий палемдалтеш. Ончыклык полководец, мыслитель, дипломат Александр Невский 1221 ий 13 майыште Переславль-Залесский Ярослав Всеволодовичын ешыштыже шочын. Тиде кугу пайремлан сылнымут да сымыктыш пӧлкаште    «Руш мландын шнуй патырже» книжно-иллюстративный ончер почылтын.

Князь Александр Невский мемнан Отечествын историйыштыже кугу верым айла. Вет тудо руш историйын корныжым икмыняр курым ончык виктарен. Тудын илыш ден пашаже  XIII курымышто эртен. Лач тунам эл кӧргысӧ  ваш умылыдымаш лийын, а Эрвел да Касвел гыч тушман лишемын. Нева да Ледовый побоищыште сеҥымек, Александр Невский Орда дене сай кылым ыштен кертын.

Книга экспозицийыште  руш полководецын илыш корныжо да тудын подвигше-влак нерген каласкалыше изданий-влак ончыкталтыныт.

Князь Александр Невскийым шарныме лӱмеш Российыште да вес эллаште шуко храм ден монастырь уло. Тидын нергенат ончерысе книга да альбом-влак каласкалат.

Тыгак автор-влак В.Г.Ян, С.Мосияш, А.К.Югов да молат шке сылнымут книгаштлан ончерыште верым муыныт, нуно Александр Невскийын мунло дипломат да ончык ужын моштышо политик улмыжым почын пуат, тудын кӧргӧ шижмашыжым, шонымашыжым, куан ден ойгыжым умылен, мыланна каласкалат.

 Александр Невскийын образшым живописьыште, семыште, кинематографийыште ужаш лиеш. Тидын нергенат книга да альбом-влак ойлат.

Книгагудыш пагален ӱжына!

---