35 ий ончыч, 1986 ий 26 апрельыште, Чернобыльысо атомный электростанцийыште техногенный катастрофа лийын. Тиде кугу ойго мыланна урок семын кодеш. Пӱртӱсым сеҥаш тӧчымына дене каласен моштыдымо эҥгек лийын кертеш. Аварий годым радиаций кышкалалт лекме дене лийше ойго — айдемын айда лийже манме койышыжо. Тидым ме мондышаш огынал, тыгай туткар уэш лийшаш огыл!

«ХХ курымсо атом ойго» Книжно-иллюстративный ончер эше ик гана ушештара: ме шкенан илыме мландынам шинчасорта гай аралышаш улына.Ончерыште документальный да художественный произведений, научный сборник, монографий да моло изданий-влак историйыште лийше эн кугу техногенный катастрофа да тудын кышаже нерген каласкалат.

26 апрель калык шӱмыштӧ радиационный аварий ден катастрофылаште колышо-влакым шарныме кече семын эрелан кодеш.

---