Кажне ийын 12 майыште Российыште да СНГ-н ондаксе эллаштыже Экологий нерген шинчымаш кече палемдалтеш. Тиде пайремын тӱҥ шонымашыже — айдемын илышыштыже йыр улшо пӱртӱс нерген шинчымашым утларак келгемдымаш. Тудым 1991 ий гыч палемдаш тӱҥалыныт. Тиде кечын тӱрлӧ экологический акцийым эртарат, ончер-влакым ямдылат, пӱртӱсым аралыме йодыш дене конференций да йоча конкурс-влакым ыштат, еҥ-шамыч тыгак вӱд серым эрыктат, паркыште пушеҥгым шындат. 
Тиде пайрем пӱртӱсым йӧратыше кажне айдемылан шерге. Экологий нерген шинчымашын акше пеш кугу. Лач тыгай шинчымаш умылтара: айдемын осал койышыжо пӱртӱслан нимучашдыме эҥгекым ыштен кертеш; тыгай ынже лий манын, мом ыштыман? Икманаш, тиде пайремын  шонымашыже — экологий культурынам нӧлталаш.
Таче кечылан Российыште экологий шинчымаш ик эн кӱлешанлан шотлалтеш. Тыгай шинчымашым школыш коштдымо изи йоча гыч тӱҥалын, вузлаште квалификацийым утларак нӧлтышӧ тунемше-влак йотке налыт. Тиддеч посна экологий нерген шинчымашым СМИн полшымыж дене, тоштер ден книгагудылаште, спорт да туризм тӧнежлашт тӱрлӧ проектым эртарыме дене пуат. Закон кӱкшытыштӧ ончалаш гын, йыр улшо пӱртӱс нерген шинчымашым РФ Конституцийын 42-шо статьяже рашемда.

---