«Читая Чехова, я смеюсь, радуюсь, восхищаюсь… Вот определение таланта».
Лев Толстой

Январь тылзыште сылнымут мастар Антон Павлович Чеховын юбилейже ыле, Писатель, драматург, Императорский шанче Академийын Почетный академикшылан 160 ий темын. Тудын ойлымаш ден пьесыже-влак ынде ятыр ий лудшо еҥым сымыстарен шогат. Йошкар-Оласе аграрный колледжын студентше-влак книгагудышто тудын илышыж да творчествыж нерген шарналташ погыненыт. Могайрак лийын тудо, Антон Павлович? Могай шижмаш тудын чонжым чӱчкыдын авалтен? Молан куанен да ойгырен?

 «Читая Чехова» лӱман сылнымут альманахым шергал лекмеке, йоча-влак писательын биографийжым шарныктыше верла дене палыме лийыныт. Кӱчык ойлымашым возышо сылнымут мастарын илышыштыже лийше шагал палыме да оҥай факт-влак нергенат тунемше-шамыч пален налыныт. Вет Чехов эше врач семынат палыме лийын, благотворительный пашамат шуктен, ятыр путешествоватлен. Вашлиймаш годым книга ончерым чумырымо ыле. Тунемше-влак уло кумылын А.Чеховын книгаже-влакым ойыреныт. Адакшым тудын ятыр произведенийже икмыняр лышташым веле айла, но тушто южгунамже уло илыш шыҥдаралтын.