22 январьыште книгагудо пашаеҥ-влак эртыше 2019 ийысе пашам иктешленыт. Йыргешке ӱстел семын лийше вашлиймаште нуно тӱҥ сеҥымаш-влак дене пырля проблеман йодыш-влакымат радамленыт, 2020 ийыште ончыклык паша нергенат ойленыт.

Эн ончычак книгагудо директор Е. А. Ерпылёва чыла пашаеҥ-влаклан таум ойлен. Тудо палемден: кодшо ий жапыште ятыр сотрудник шке шинчымашыжым нӧлтен. Коллективын сай пашажлан кӧра таче мемнан регионышто тудо кӱшыл верым налеш.

Марий Эл Республикысе тӱвыра, печать да калыкле паша шотышто министрын алмаштышыже А. Н. Луничкин культур политикыште улшо кӱлешан йодыш-влакым нӧлталын, йоча кенигагудын кӱлешлыкшым пеҥгыдемден да Россий Президент В. В. Путинын 2020 ийысе Федеральный Собранийлан  Посланийже нерген ушештарен. 

Директорын алмаштышыже И. Ю. Комиссарова палемден: библиотека кугыжаныш заданийым тӱрыс шуктен, лудшо еҥым обслуживатлыме шотышто «независимая оценка качества» манме умылымашын иктешлымыж почеш республикысе моло книгагудо-влак коклаште  1-ше верым налеш.

Йыргешке ӱстелын участникше-влак вес регионласе коллегышт-влак дене пеҥгыде кылым ыштымышт нерген ойленыт, писатель Ая-эН да  «Книгуру» Всероссийский конкурсын экспертше К. Молдавская дене вашлиймашым, «Символы России. Спортивные достижения» Всеросийский олимпиадын региональный этапше, тыгак тӱрлӧ творческий конкурс эртыме нерген ушештареныт,

Книгагудысо пӧлка-влакым вуйлатыше-шамыч йоча да самырык-влакын книга деке шӱмаҥдыме ятыр йӧн дене пашам ыштымышт нерген ойленыт. Посна тӱткышым  Российысе Театр ийлан пӧлеклалтше да планыш пуртымо мероприятий эртымылан ойрымо.  Специалист-влак эше ик гана пеҥгыдемденыт: йоча-влаклан шичымаш материалым пуымо шотышто чын паша формым ойырымаш — ик эн кугу паша.

2020 ийыштат кок кугу событий вуча: 1941-1945 ийласе Кугу Отечественный сарыште сеҥымылан 75 ий да Марий Эл Республикын 100 ияш лӱмгечыже. Тиде шерге дате-влак дене кылдалтыт 2020 ийыште ыштышыш паша-влак.

---