Республикын 100 ияш лӱмгечыж вашеш ме кундемнан чапланыше сылнымутчышт-влак нерген каласкалыше «Марий Элын талант памашышт» лӱман циклым почынна. Тудын икымше унаже — поэтесса Валентина Михайдаровна Изилянова.

В. Изилянован поэзийже — пӱсӧ шижмашан, волгыдо шӱлыкан чонсавыртыш. Автор шочмо мланде, калыкше нерген чон вургыж возымо дене пырля айдемын кӧргӧ шижмашыж нергенат келгын шонкала. Лач тидын нергенак 9-ше номеран школын 10 классыштыже тунемше-влак мутланеныт. Нуно «Валентина Изилянова: чон поэзий» лӱман урокышто поэтессын илыш да творчествыж дене палыме лийыныт. 

Тудын творчествыже — тачысе марий поэзийыште ик эн волгыдо да виян. Валентина Изилянова — Олык Ипай да Сергей Чавайн  лӱмеш Кугыжаныш премий-влакын лауреатше, марий, руш да эстон йылмыла дене лекше шым книган авторжо. Тудо тыгак «Литературная Россия» еженедельникыште, тӱшка ссборниклаште, антологийлаште савыкталтеш.

---