XX-шо курым тӱҥалтыш тӱнялан ятыр кугу талантан поэтым пӧлеклен. Кушто нуно, Ший курымын мастарже-влак, шке мастарлыкыштым ончыктен кертыныт? Кафеште але унагудылаште. Кумдан палыме — кафе «Бродячая собака», тудыжо Петербург олаште верланен улмаш. Тушко тудо пагытысе сылнымут илыш дене келаныше еҥ-влак погыненыт. Лач тидын нергенак  Йошкар-Оласе аграрный колледжын студентше-влак кумданрак пален налыныт.

Тунемше-влак тиде заведенийын ӧрыктарыше историйже дене палыме лийыныт. Тыгак тудын чӱчкыдӧ унаже-влак – Н. Гумилев, А. Ахматова, М. Кузмин, К. Бальмонт, О. Мандельштам, В.Маяковский — нерген мутланеныт. Нине поэт-влакын творчествышт моткочак чоным тарватыше лийыныт, эсогыл ятыр почеламутыштлан сӧрал романс-влак возалтыныт. Студент-влак нине уста поэт-шамычын возымыштым, тыгак романс ден муро-влакым чон шулен колыштыныт. Можо оҥай: тиде «Бродячая собака» арт-кафе кызытат уло да тушко чайым йӱаш пурен лекше-влаклан шке историй лаштыкшым шергалаш темла.

---