Тазалык — мемнан тӱҥ поянлыкна! Тидын нерген эреак шарнаш манын, 1950-ше ий гыч кажне гана 7 апрельыште Тӱнямбал тазалык кечым пайрем семын палемдаш пунчалме.

6 апрельыште книгагудышто «Тазалык элым кычалмаште» лӱман модыш-путешествий эртен. Йошкар-Оласе 1-ше номеран школышто тунемше йоча-влак тазалыкым рвезынек аралаш, пайдале кочкышым кочкаш, зарядкым ышташ манме шонымашым ушышкышт пыштеныт манын ӱшаныме шуэш.

Импровизироватлыме Корабль дене йоча-влак Тазалык элым кычалыныт, кудыжым тӱнямбалсе ик картыштат ончыктымо огыл. Тӱрлӧ элла, отро, материкла воктеч ийын кайыме годым нуно капитанын шӱдымыжым шуктеныт: туштым туштеныт, интеллектуальный модыш-влак дене модыныт,  Физкультур отрошто зарядкым ыштеныт. А пытартышлан ӱдыр-рвезе-шамыч «Витамин-влак» мультфильмым онченыт да кочкышын пайда да эҥгекше нерген пален налыныт.

Ожнысо калыкмут ойла» Тазалык пуд дене толеш, шӧртньӧ дене кая».

Шке тазалыкдам аралыза!

---