Кушкын толшо тукым яра жапым кузе эртара? Шуко ятыр йодыш самырык ончылно шога. Кузе йолташ-влакым муаш? Кӧ лияш? Чын йӧратымашым муаш манын, мом ыштыман? Лудаш кумылдымо-влаклан могай книгам темлыман?

Самырык еҥлан книга сай йолташ лийын кертеш. Кажне айдеме шканже келшыше произведенийым лудаш ойыра. Тиде — чоным тарватыше классический литератур але шонаш таратыше кызытсе сылнымут. Ятыр книга коклаште чонлан келшышыжым ойыраш «У книга-влакын компасше» лӱман сылнымут обзор полшен кертеш. Кызытсе сылнымутын авторышт лудшо-влакын уш-акылыштым пойдараш, шке шонымашым почын мошташ туныктат. Тунемше-влак Д. Сабитован, Э. Веркинын, Т. Михееван, А. Жвалевскийын, Е. Пастернакын, С. Лаврован, Н. Абгарянын, И. Богатыреван, Н. Дашевскаян,  М. Логиновын да молынат произведенийышт дене палыме лийыныт. Самырык да талантан автор Анна Никольскаян книгаже-влак поснак чылалан келшен. «Рунетын книга премийже» лудшо-влак кокласе йӱклымашын иктешлымашыж почеш Никольская йоча да самырык-влаклан возышо эн сай автор семын палемдалтын.

Самырык тукымлан возымо кызытсе сылнымут обзор йоча-влаклан пайдале лийын. Нуно у да оҥай книга-влакым лудаш кумылаҥдат. Тиде вашлиймаш лудмаш деке сай тӱҥалтыш лийын кертеш манын шонаш чыла амал уло.

Книгагудыш пагален ӱжына!

---