Екатерина Клюжева тыглай  писатель гына огыл, а йоча писатель. Икшывылан возаш поснак кугу мастарлык кӱлеш. Вет йочалан возышо айдеме тӱням йоча семынак ужын да шижын моштышаш.
Вашлиймашыш Йошкар-Оласе А.С.Пушкин лӱмеш гимназийын 3«в» ден 3«д» класслаштыже тунемше-влакым ӱжмӧ ыле. Тӱҥалтышлан Екатерина Клюжеван творчествыж нерген презентайций да книга ончер дене палыме лийме.

Писательнице шке илышыж гыч оҥай историй-влакым шарналтыш, шкенжын возымо икымше почеламутшым уло кумылын лудо, ятыр йодышлан вашмутым пуэдыш. Чылалан палаш оҥай лийын: кузерак эртен йоча пагытше, могай школышто тунемын, могай книгам лудаш йӧратен?

Шерге уна шкенжын у ойлымашыжым лудо, кудыжо йоча-влаклан моткочак келшен. Е.Клюжева дене вашлиймаш тунемше-шамычлан кужу жап шарнымашеш кодеш, очыни.

 

---