Шошо волгыдо пайрем-влаклан поян. Нунын кокла гыч иктыже — Православный книган  кечыже. Тыгай пайремым эртараш Святейший Патриарх Московский да всея Руси Кирилл 2010 ий 14 мартыште темлен. Руш Православный Черкысе Священный Синоидын  2009 ий 25 декабрь годсо погынымашыштыже книга гоч черке деке лишкырак лияш кӱлмӧ нерген йодышым нӧлталме. Тыге Православий книга кечым  Иван Федоровын «Апостол» икымше печать книгажын савыкталмыж дене(1564 ий 1 март) кылдалтын палемдаш ойым пидме.

Шукерте огыл Калыкле Президент школ-интернатын 3 классыштыже тунемше йоча-влаклан  «Порылык книга-влак» лӱман мероприятий эртен. Тушто икшыве-влак ХIХ — ХX курымлаште духовно-нравственный литературым возышо писатель да тыгай жанр денак пашам ыштыше кызытсе автор-влак нерген пален налыныт. Йоча-влак Библий сюжет да Евангелийысе историй  гыч ужаш-влакым, тӱрлӧповесть, йомак да почеламутым лудыныт. Православный литературын поро шӱлышыжӧ  икшыве-влакын чонышкышт  волгыдылыкым шарен. Нунылан  «Православийын книга тӱняже»ончер гыч книга-влакым налын лудашат  йӧн лийын. Тиде ончер краеведений да периодике залыште верланен. Ала-кунам  старец Макарий Оптинский каласен: «Духовный книгам лудмаш мемнан уш-акылнам вияҥда, аралалт кодаш манын,  корным ончыкта, шӱм-чоннам пойдара».

 

---