Шукерте огыл книгагудына Моско гыч уна-влакым вашлие. Мемнан деке сылнымут критик, журналист, педагог, «Книгуру» Всероссийский конкурсын экспертше  Ксения Александровна Молдавская ден писатель Ая эН (Ирина Борисовна Крестьева) толыныт.

Пресс-конференцийыште Марий Эл Республикысе тӱвыра, печать да калык-влакын пашашт шотышто министрже К.А. Иванов, министрын алмаштышыже А.Н. Луничкин, журналист ден кугыжаныш книгагудын пашаеҥышт-влак, Йошкар-Оласе туныктыш тӧнежла гыч туныктышо-шамыч лийыныт.

Ксения Молдавская ден Ая эН  йоча да самырык-влаклан эн сай произведний-влакым возымо «Книгуру» Всероссийский конкурс нерген каласкаленыт, кызытсе йоча сылнымут шотышто лекше йодыш-влаклан вашештеныт. 

Йоча лудмаш дене пашам ыштыше специалист-влаклан Ксения Молдавская «шонен лудшо» манме умлымашын воспитаний проблемыжым ойлен, самырык еҥым лудмо книгаж нерген шке шонымашыжым возаш туныктымо оҥай методикым темлен. Тудо поснак палемден: «Книгуру» конкурс тӱняште икте веле, куштыжо жюри семын иктешлымашым изи лудшо-влак шкештак ыштат.

Торгово-технологический колледжын да Йошкар-Оласе 4-ше номеран гимназийын тунемшышт Ая эН дене вашлийыныт. Йоча-шамыч тудлан ятыр йодышым пуэныт, шке шонымашыштым ойленыт. Нунылан чылажат оҥай лийын: кушеч тыгай псевдоним лектын, сылнымут деке мо шӱмаҥден, кузе книга возалтеш да молат. Эше тунемше-влак пален налыныт: «Книгурун» жюри еҥже кузе лияш. Кӧ пала, ала нунын коклаште тыгай кумылан-влакат лектыт.

---