Йоча книга арня — йӱлаш пурышо книга пайрем. Тудо йоча сылнымут ден книгасе герой-влаклан поян. Йомак ден повестьым, роман ден ойлымашым, почеламут ден шотлеммутым серыше автор-влак мыланна чынжымак кугу пайремым пӧлеклат.

Шошо каныш жапыште книгагудышто йоча-влакым кажне кечын могай-гынат вашлиймаш вучен. Пайрем арням марий поэтесса Надежда Никитина дене сылнымут вашлиймаш почо. Изи лудшо ден нунын ача-аваштлан автор шке творчествыж нерген каласкалыш, икшыве-шамычын йодышыштлан вашештыш, а йоча-влак тудын возымо почеламутшо-влакым лудыч.

Тиде кечынак актер мастарлыкым пуышо педагог Анастасия Баженова дене авторский тренинг лийын. Тушто ӱдыр-рвезе-влаклан шкеныштым изи артист семын шижаш йӧн лийын.

А теве поэт лийын ончаш манын, лудшо-влакна Жанна Кулалаеван «Стихоговорки» мастарлык классышкыже погыненыт ыле. Нуно тушто тӱрлӧ авторын почеламутыштым лудыныт, мурым муреныт да шкешат изирак почеламут-влакым шоненыт.

Школыш коштшо икшыве-шамычлан  «Происшествие в городе трех толстяков» лӱман сылнымут модыш эртен. Йоча-влак викторине ден тӱрлӧ модышлаште вийыштым тергеныт, тыгак Ю. Олешан «Три толстяка» повестьше  почеш шындыме кинофильм гыч ужашым онченыт.

Кугурак класслаште тунемше ден студент-влак у литератур дене палыме лийыныт. Э. Веркинын, А. Жвалевскийын, А. Никольскаян, И. Богатыреван, Н. Дашевскаян, О. Райнын, А. Энын кызытсе тукымын пӱсын шогышо йодышышт нерген серыме книгаштым шерген лектыныт.

 «О книгах прекрасных, проблемных и спорных» лӱман увер досье мемнан лудшына-влакым шке векыже чынжымак савырен манын шонена.

Йоча книга арня «Лудаш, тӱням саемдаш манын»  сылнымут дилижанс дене мучашлалтын.  Йоча-влак Н. Носовын, К. Чуковскийын, А. Бартон да моло автор-влакын книга геройышт дене палыме лийыныт.

---