Иван Тургенев XIX-ше курымысо руш писатель-влак коклаште ик эн ончыл радамыште лийын. Тудын ыштыме сылнымут системыже Российыште веле огыл, тыгак вес эллаштат романын поэтикыжым вашталтен. Тудын произведенийже-влакым моктенытат, вурсенытат, а Тургенев илышыж мучко тугай йӧным кычалын, кудыжо Российым пеледме корныш шогалтен кертеш. 

9 ноябрьыште руш кугу писатель да поэт, пӱртӱс мурызо И.С.Тургеневын шочмыжлан 200 ий темеш. Тудын илыш да творчествыжлан мемнан книгагудышто «Тургеневым почаш жап» сылнымут шагат пӧлеклалтын. Тушко Клыкле президент школ-интернатысе 7 да 8 класслаште тунемше-влак погыненыт ыле. Нунылан классикын кӧргӧ чон тӱняжым почын пуаш полшышо мультимедийный презентацийым ончыктымо. Теве, мутлан, И.Тургеневын мутшылан возымо «Утро туманное» романс писательын Шочмо эл дек, калыкше дек, руш йылме дек йӧратымашыжым сайын почеш. 

 

---