Ӱярня — весела пайрем. Еҥ-влак Ӱярня арня жапыште муро да мелна дене телым ужатен, шошым вашлийыт, тер дене мунчалтат, гармонь почеш мурат. Ойленыт, пуйто тиде пайремым кузе вашлият, ий мучко тугак илаш тӱҥалат. Теве 9-ше школын 3-шо классыштыже тунемше-влакланат Ӱярням ончалаш пеш весела ыле. Ӱдыр ден рвезе-влаклан пайрем йӱлан кузе эртымыже моткоч келшен. Ондак Русиште Ӱярня пайрем (Масленницым) кузе эртыме нерген  «Кумда Ӱярня» лӱман мультимедийный презентаций каласкален. Тыштак йоча-влак марий пайрем нергенат пален налыныт. Вет тудо вожшо дене акрет чимарий йӱлашке кая. Пайрем кумылым утларак нӧлталаш манын, йоча-влак шкеак курчак-аралтышым ыштеныт да шарнымаш семын пеленышт наҥгаеныт.

---