«Калейдоскоп» ончер пӧлем талантан самырык сӱретче, Россий художник ушемын еҥже Анна Санникован пашажым аклаш темла. Радынаш вочшо сӱрет-влакым марий калыкын илыш книгаже манаш чыла амал уло. Нуно Кугу Юмын Мландым шочыктымо пагытым, марий калыкын акрет годсо илышыжым почын пуымаш гыч тӱҥалыт. Сӱрет-влаклаште шочмаш ден колымаш темым, пайрем йӱлам, марийын тыглай кечысе илышыжым ужаш лиеш. Чыла композиций-шамыч марий тӱр дене сӧрастарыме улыт. Паша-влакын эше ик оҥай ойыртемже: радына-влакым пушеҥге йытырыш мастарын вераҥдыме.

Шочмо вер-шӧр дене кылдалтше темым «Мыйын вургемем – мыйын историем» этно-ончер шуя. Тудо финн-угор калык-влакын вургемышт дене палдара. Ончерыште  Людмила Александровна Иванован личный коллекцийже гыч финн-угор-влакын вургемыштым чийыше кукла-влакым ужаш лиеш.

Марий тӱвырам пагалыше да аклыше чыла кумылан-шамычым ончер пӧлемыш уло кумылын вучена. Тудо кажне кечын, шуматкече деч посна, 9.00 гыч 16.00 шаг. марте пашам ышта.

---