Россий кумдыкышто 190 наре калык ила. Кажныжын шке йылмыже, тӱвыраже, илыш-йӱлаже. Россий калыкын тӱвыра поянлыкшылан пӧлеклалтше ийлан да Российысе калык-влакын тӱвыраштым аралыме амал дене В.Х.Колумб лӱмеш Республикысе йоча да самырык-влаклан книгагудышто «Илыше памаш» Регион-влак кокласе акций тӱҥалеш.

Акцийыш  библиотекарь, педагог-влак ушнен кертыт. Участник-шамыч видеороликым возышаш улыт (йомакым лудмаш, инсценировка, театрализованный представлений), тудо  5 гыч 15 минут марте шуйнен кертеш.

Сай паша-влакым «Илыше памаш» мультимедийный йомак коллекцийыш пуртат, тудыжым книгагудын сайтыштыже Калык фольклор кечын, 17 июльышто, ончаш лиеш.

Конкурс нерген рашрак  Увер серышыште

Шерге таҥ-влак!

Кумылан-влакым Регион-влак кокласе «Сар нерген, тыныслык нерген, Сеҥымаш нерген» II-шо дистанционный  почеламут лудмо конкурсыш ушнаш ӱжына. Тудо Кугу Отечественный сарыште Сеҥымаш кечылан пӧлеклалтеш.

Конкурсышто 4 гыч 7 ияш марте йоча-влак Марий Эл Республик да Российысе моло регионла гыч участвоватлен кертыт.

Конкурсыш Кугу Отечественный сарлан пӧлеклалтше почеламутым войзымо ик видеороликым колтыман. 

2022 ий 28 апрельыште 10 шагатлан (мск) В.Х.Колумб лӱмеш йоча да самырык-влаклан книгагудышто «Колумб лудмаш» Регион кокласе VI-ше научно-практический конференций лиеш. Темыже: «Краеведение: новые возможности и перспективы сотрудничества».

Конференций  Россий калыкын тӱвыра поянлыкшым аралыме  ийлан да книгагудын 55 ияш лӱмгечыжлан пӧлеклалтеш. 

Сандалыкын кумдыкыштыжо мо ышталтеш? Мом тудо шылта? Тиде да моло йодышлан вашмут кӱлеш гын, «Космосын туштыжо-влак»  книжно-иллюстративный ончерыш миен толаш темлена. Тудо Космонавтикын кечыжлан пӧлеклалтын.

Ончерыште сӧрал книга-влак галактика, планета да шӱдыр-влак нерген каласкалат. Тендам вучат: Ю. Усачевын «Один день в космосе», Люси ден Стивен Хокингын «Джордж и сокровища Вселенной», Степан Каймановын «Большой взрыв» да моло оҥай книга-влак!

Книгагудыш пагален ӱжына! 

XX-шо курым тӱҥалтыш жапыште марий поэт-влак коклаште кугу верым Олык Ипайын лӱмжӧ налеш. Олык Ипайын шочмыжлан 110 ий темме вашеш «Кӱрылтшӧ сем» сылнымут портретым ямдылыме. Марий кугыжаныш университетын студентше-влаклан поэтын илыш да творчествыж нерген каласкалыше мультимедийный презентацийым ончыктымо.

Мемнан элыште кумдан чапланыше швед писательница Астрид Линдгренын геройжо-влакым палыдыме еҥже укеат дыр. Изи лудшына-влаклан книгагудыштына «Линдгренын весела элже» костюмированный пайрем эртен, тудо авторын 115 ияш лӱмгечыжлан пӧлеклалтын.  Йӧратыме писательнице нерген каласкалымаш йоча-влаклан пеш келшен, вет тудо шкежат йочаж годымат, кугу лиймекат хулиган койышан лийын. Весела Карлсон дене пырля модмаш, оҥай конкурс ден викторина-влак, эреак ум шонен лукшо Пеппи Длинныйчулок да Фрекен Бокын туныктен ойлымыжо пайремым чынжымак кумыланым ыштеныт. 

Тӱнямбалсе театр кече вашеш 16-шо номеран школысо 1-ше классыште тунемше-влак дене пырля «Икана театрыште, але Посна кӱлешан заданий» театральный квиз эртен. Участник-влаклан модыш программа почеш путешествийыш тарванаш да тематический заданий-влакым шукташ кӱлын, кроссвордым решатлен, древнегреческий юмынӱдырын лӱмжым палыман улмаш. Тудо — театр сымыктышын покровительницыже. Ӱдыр-рвезе-влак шкеныштым ялт актёр семеш ужыныт, нуно руш калык йомакым модын ончыктеныт. Йоча-шамыч рольышытым устан модыныт, а ончышо-влак кидсовышым чаманен огытыл. Юзо тӱняш миен толмо дене, йоча-влак ӧрыктарыше приключений дене пырля театральный сымыктышын истрийжым эше утларак пален налыныт.