«Тӱнямбалсе кугу музей-влак» цикл гыч «Сылнылык деке унала» арт-вашлиймаш 29-ше номеран школысо 8-ше класслаште тунемше-влаклан эртен. Нуно Лондонысо калыкле галерейышке виртуальный экскурсийым ыштеныт. 

Тиде тоштерын экспозицийыштыже XIII-XX курымласе чыла гаяк кугу сӱретче-влакын пашашт аралалтеш. Тысе радына-шамыч хронологий почеш вераҥдалтыныт. Садлан тунемше-влак сӱрет-влакын ятыр курымла дене технически кузе вашталт толмыштым раш ужыныт.

Презентаций полшымо дене сылнылык тӱняшке логалын, вашлиймашыш толшо-влак ятыр художник-импрессионистын пашаштым аклен кертыныт, тӱнямбал культурлан келшыше «Возрождение» терминым кумданрак умылаш тыршеныт. Поснак  Сандро Боттичеллин «Венера и Марс», Яна ван Эйкын «Портрет четы Арнольфини», Питер Пауль Рубенсын «Соломенная шляпка», Леонардо да Винчин «Мадонна в скалах» да молынат пашаштлан тӱткышым ыштеныт. Тыге йоча-влаклан шке шинчымашыштым пойдараш сай йӧн лийын.

---