Шӱлыкан шыже кечын поэзийым йӧратыше-влак мемнан книгагудышто поэзий пайремыш погыненыт: тушко поэт, кусарыше, Марий Эл сымыктышын сулло пашаеҥже Альбертина Иванова толын.

Талантан айдеме дене вашлиймашыш Марий Кугыжаныш университетын студентше-влак толыныт ыле. Альбертина Петровнан сылнымутшо чоным тарватыше, кумылым налше. Ӱдыр-рвезе-влаклан чылажат оҥай ыле: икымше почеламут, йоча годсо йӧратыме книга, пагалыме поэт але писатель, савыктыш паша…

А.Иванован поэзийже марий сылнымутышто веле огыл, финн-угор тӱняштат кугу кӱкшытым куча. Ик эн виян произведенийже — «Арале мыйым, волгыдо юмем» поэтический драме. Тунемше-влак филологий наука кандидат Г.В. Бояринова дене пырля тиде произведенийлан акым пуэныт, ятыр йодышым каҥашеныт.

Вашлиймаш мучаште мурызо да журналист Алена Яковлева А. Иванован мутшылан возымо «Вучыдымо вашлиймаш» мурым автор дене йоҥгалтарен. Тыгай вашлиймаш чылалан моткоч келшен.

---