Краеведений да периодика пӧлемыште иллюстрироватлыме книга ончер почылтын. Тудо Российын сулло сӱретчыже, МАССР-ын сулло пашаеҥже, А.В.Григорьев лӱмеш кугыжаныш премийын лауреатше  Иван Михайлович Ямбердовын илышыже да творчествыжлан пӧлеклалтын.

Тиде марий сӱретчын радынаже-влак чоным авалтыше, шонаш таратыше улыт. нуно пуйто ала-мом каласен шуктыдымым ойлынешт. Марий тӱням чия полшымо дене почын пуымаште И.Ямбердовын произведенийже-влак кумда философий дене шыҥдаралтыныт. Тудын геройжо-шамыч пӱртӱс дене ойыраш лийдымын кылдалтыныт. 

Иван Ямбердовын пашаже-влак мемнам сылнылык тӱняшке вӱден пуртат да тӱняумлымашнам, уш-акыл кӱкшытнам пойдарат.

Илыш, моторлык, йӧратымаш — тиде курымашлык темылан пӧлеклалтыныт тудын радынаже-влак.

Книга ончерыште И.Ямбердов нерген каласкалыше книга, журнал-влак лудшо-шамычым вучат. Ме чыла кумылан-влакым вашлияш ямде улына.

---