«Роман-газета» — тиде ик эн сай отечественный сылнымут.

Тиде журнал индешле ий утла шке содержанийже, формыжо, стильже дене кугу элнан пӱрымашыжым почын ончыкта.

Сывктышын могай лийшашыж нерген ойым В.И.Ленин темлен.  1921 ийыште тудо РСФСР просвещенийын калык комиссариатше ончылан задачым шынден  – калыклан «пролетар газет»,  «шулдо книга» сынан сылнымутым савыкташ кӱлеш. Журналым ыштымаште кугу пашам Максим Горький шуктен, тудак «Роман-газета» кугыжаныш проект семын лийже манын тыршен. У журнал калыкым отечественный да тӱнямбал сылнымут деке мелын ыштышаш да талантан писатель-влакым ушышаш  улмаш.

 «Роман-Газетын» икымше номерыштыже немыч писатель Иоганнес Бехерын «Грядущая война» романже савыкталтын.

Ятыр ий жапыште журналын 700 наре авторжо погынен, 1200 утла роман, повесть, ойлымаш, художественно-документальных произведений, тыгак 13 поэзий сборник савыкталтын.

М. Шолоховын да Л.Леоновын, В. Катаевын да А. Твардовскийын, А. Федоровын да  В. Тендряковын, А. Рыбаковын да И. Шмелёвын, А. Солженицынын да В. Аксёновын, В. Быковын да Ю. Бондаревын, Ч. Айтматовын да Р. Гамзатовын, В. Астафьевын да К. Симоновын, М. Алексеевын да А. Ананьевын, В. Шукшинын да В. Песковын, В. Распутинын да В. Пикульын, Е. Евтушенкон да Ф. Абрамовын, В. Беловын да Б. Можаевын, Л. Бородинын да В. Пронинын, З. Прилепинын да Р. Сенчинын призведенийже-влакым миллион еҥ лудын.

«Тихий Дон» ден «Русский лес», «Василий Тёркин» ден «Привычное дело», «Один день Ивана Денисовича» ден «Мой Сталинград», «Живи и помни» ден «Царь-рыба», «Они сражались за Родину» ден «Поднятая целина», «Последний поклон»  «Плаха», «Двадцать дней без войны» ден «Волчья стая», «Дом» ден «Фаворит». Нине произведений-влак калык коклаш  писын шарлен.

Вес элласе автор-влакат ӧрдыжеш кодын огытыл: Э. М. Ремарк, Э. Л. Войнич, Д. Олдридж, Д. Стейнбек да молат.

Тачат  «Роман-газета» журнал сылнымут произведений-влакым ятыр савыкта.

Совет жапыште «Роман-газетын» тиражше ныл миллион экземплярыш шуын. Таче тудо ятырлан шагалемын гынат, тудын тӱҥ пашаже тугак кодын – лудшо еҥын кумылжым шукташ.

«Роман-газета» нерген книгагудын лудмо пӧлемыштыже палыме лийын кертыда.