РУССКИЙМАРЛА КАРТА САЙТА

Марий йылмым ынде англичанлат тунемаш лиеш

Лу ий наре пашам ыштыме деч вара англичан йылме дене возымо «Оҥай марий йылме: A Comprehensive Introduction to the Mari Language» («Оҥай марий йылме. Тӱҥалтыш курс») тунемме книган тичмаш версийжым савыктыме нерген куанен увертарена. Икымше ужашын ондакысе версийже эше 2010-ше ийыштак ош тӱням ужын.

Ямдылен пытарыме 771 лаштыкан тунемме книга 40 глава гыч шога. Тудым tk.mari-language.com интервот-лышташ гыч яра (окса деч посна) возен налаш лиеш. 2010-шо ийысе савыктыш деч кызытсе версий кок пачаш кугурак улмыж дене веле огыл ойыртемалтеш. Ынде тунемше-влак книгаште кӱлешан йылме кончышым муаш тематике глоссарий дене пайдаланен кертыт.

Тыгак у версийыште марий йылмысе чыла гаяк суффиксым радам дене пуымо да т. м. Книга пеленысе аудиофайлымат кучылташ лиеш. Тиддеч посна Memrise лӱман кумдан палыме тунемме интернет-ресурслан материалым ямдылыме, тыге студент-влак «Оҥай марий йылме» книгасе мутвундым шке компьютерышт але мобил ӱзгарышт дене тунемын да ушештарен кертыт.

Тыгакак paradigm.mari-language.com вот-лаштыкыште мут вашталтме радам генераторым вераҥдыме. Тудлан эҥертен, тунемше-влак лӱм мутын, глаголын да почеш мутын тичмаш парадигмыштым ыштен кертыт. Вес вот-лаштыкыште (transcribe.mari-language.com) марий текстым латиницыш кусараш да тудын транскрипцийжым ышташ йӧным пуышо программе-влак улыт. Тидыже поснак йотэл шымлызе-влаклан пайдале лийшаш.

Палдарыме тунемме книга ончыкшым савыкташ шонымо материал кокла гыч иктыже веле. Тачысе кечын  тыгак «Reading Hill Mari through Meadow Mari» («Олыкмарий йылме гоч курыкмарла умылаш тунемына») книга дене (2017-ше ий шыжа тылзыште лекшаш) да курыкмарий мутер дене (2017-ше ий теле тылзыште лекшаш) паша ышталтеш. Курыкмарий мутер 2014-ше ийысе марла-англичанла мутерын пеленлыкше семын лиеш.

2017-ше ийыште савыктышаш материалым Коне Фондын окса полышыж дене ямдылыме.

MariUver сайт гыч