«Канде кайык» гимназийын 3 классыште тунемшыже-влак кумдан палыме «Марий Чодыра» Кугыжаныш парк мучко  виртуальный экскурсийым ыштеныт. Тыгай мероприятий Экологий ийлан пӧлеклалтын. Парк мемнан республикыште веле огыл, тыгак ӧрдыж кундемлаштат палыме.

 Йоча-влак паркын историйжым пален налыныт, тудын моторлыкшым да поянлыкшым ужыныт. Янлык да кушкыл тӱня, чодыра, эҥер да ер шке сылнылыкышт дене кажне еҥым сымыстарат. Адакшым тыште тазалыклан пайдале памаш-влак верланеныт. Эн палымыже Ваштар курыкышто улеш. Но тиде моторлык еҥ-влакын полшымышт деч посна ок лий ыле, нуно «кава йымалсе тоштерым» арален шогат. Йоча-влак чодыраште шкемым кузе кучымо нерген пален ойленыт, «Чодыраш коштшын Азбукыжо» лӱман брошюрым пӧлек шотеш налыныт. Вашлиймаш оҥай викторине дене мучашлалтын.

---