Йомак пӧлемыште  76-шо номеран йочасадысе икшыве-влак профессий тӱняшке миен коштыныт. А чынрак гын — пален налыныт, кушто да кӧлан пашам ыштен кертыт йӧратыме ава, кова, кока-влак. Тӱҥалтышлан Сергей Михалковын «А мо тендан?» кумдан палыме почеламутшо йоҥгалте. Тушто  лач ӱдырамаш профессий-влак нерген ойлалтеш.

Путешествийын корныжат оҥай лийын. Теве станций-влак: «Кевыт», «Моторлык салон», «Школ», «Больнице», «Кафе», «Ателье».  Кажне остановкышто йоча-влак туштылан вашмутым кычалыныт. Нунышт тӱрлӧ профессий дене кылдалтше лийыныт. Путешествий йоча-шамычлан пеш келшен: «парикмахер-влак» ӱпым пуненыт, «кевытче-влак» сатум ужаленыт, «повар-шамыч»  борщ ден компотым шолтеныт, «дизайнер-влак» вургемым моделироватленыт да молат, эсогыл  «логопедат» лийыныт. Икшыве-шамыч ӱдырамаш профессий нерген пален веле огыл, тыгак нунын пашаштым шкак «ыштен» онченыт.

---