21-ше шыжан йомак пӧлемыште «Кушеч толын мемнан дек книга» мастер-класс эртен. Тушто Еш да йочалан полышым пуышо рӱдер гыч толшо икшыве-влак лийыныт. Ты мероприятий тазалык дене начар улшо йоча-влаклан «Кунам уло книга, тый шкет отыл» программе почеш эртаралтын.

Йоча пӧлемын поро юзо шӱлышыжӧ книгам лудаш веле огыл, тыгак икте-весе дене келшен илаш кумылаҥда.

Мастер-класс годым ӱдыр-рвезе-шамыч кагазын да книган  кушеч ышталтмышт нерген пален налыныт, а вара шкештак изи книга-влакым ыштеныт. Тыгодым пӧлемыште муро сем йоҥген. Йоча-влак, ыштыме пашашым аклен, моткоч куаненыт: вет икымше гана шкегыч книгам чумыреныт. Тыгай сынан  вашлиймаш-влак  икшыве чонышто порылыкым, ончыклыклан волгыдо ӱшаным шочыктат!

---