1-ше шыжа — Тӱнямбал музык кече. Кугу да изи концерт площадкылаште кумдан палыме тӱрлӧ сем ден муро-влак йоҥгеныт. Музыкым йӧратыше-шамычлан тиде кече чынжымак кугу пайремыш савырнен. Мемнан лудшына-влак 3-шо шыжаште «Джаз импровизаций-влак» лӱман концертым колышт кертыныт. Тӱнямбал классикан произведенийлам Марий Эл Республикысе тӱвыра да сымыктыш колледжын студентше-влак йоҥгалтареныт.
 «Джаз импровизаций-влак» — тиде 20-шо курым тӱҥалтышсе новоорлеанский да чикагский джаз,  30-шо ийласе свинг, 40-ше ийла мучашсе буги-вуги стиль-шамыч. Ончыклык  музыкант-влак Андрей Ромашкин ден Георгий Сурков тӱрлӧ семын йоҥгалтше джаз-влакым моткочак устан шоктышт. Кларнет да саксафон почеш йоҥгалтше семйогын колыштшо публикын кумылжым нале. Книгагудо пашаеҥ-влак джазын историйже, тудын тӱрлӧ стильже да направленийже нерген каласкалышт, книга ончерым темлышт. Джаз да книга икте-весышт дене пеш келшат улмаш.

---