Шергакан лудшына-влак, пагалыме книгагудо пашаеҥ да книгам йӧратыше-влак! Чуваш Республикысе йоча да самырык-влаклан книгагудо 27-28 сентябрьыште «Лудаш — КЫЗЫТАК!» Россий кӱкшытан слётым эртара. Самырык лудшо-влакым, тыгак ача-ава-шамычым кумдан палыме возышо-влак дене вашлиймаш, тӱрлӧ мастар класс, у савыктыш дене палыме лиймаш, КВН модыш вучат.

Слёт 27 сентябрьыште 11 шагатлан почылтеш. А вара «Молан айдемылан книга» лӱман форум шке йырже лудшо да самырык книгагудо пашаеҥ-влакым чумыра. Нуно кызытсе  йоча сылнымутышто тыршыше Юрий Кузнецов, Настя Строкина, Евгений Рудашевский, Евгения Басова, Светлана Гордеева, Наталья Васильева дене вашлийыт. Тыгак Нижегородский, Белгородский, Псковский, Брянский да Орловский областьла гыч, Марий Эл  да Чуваш Республикысе районла гыч уна-влак  шке паша лектышышт дене палдараш тӱҥалыт. Йоча-шамычлан «Книга кумылаҥден», «Книга да кино» мастар классан фильмлам ончыктат, «Электрон форматысе книгагудо», «Литератур разведке» мастерской-влакым темлат.

28 сентябрьыште «Лудаш — пайдале! Лудаш — оҥай! Лудаш — пагытын йодмыжо! Лудаш — КЫЗЫТАК!» лӱман ончерын презентацийже лиеш. Тушто моторын сӧрастарыме у савыктыш-влак дене палыме лияш йӧн лектеш.  Адакшым «Книга + Кино» КВН модмаш  изи лудшо ден самырык книгагудо пашаеҥ — влакым чумыра.

Марий Элысе  В.Х.Колумб лӱмеш книгагудат слётышко шкенжын делегацийжым колта. Йошкар-Оласе 3-шо номеран школын 3-шо классыштыже тунемшыже  Тимофеев Аким — делегацийын участникше. Тудо — книгагудын сай лудшыжо, «Мланде — мемнан пӧртна» сӱрет конкурсын сеҥышыже, литератур пайремыште Незнайкын рольжым сайын модшо талантан рвезе.

Ӱшанен кодына, Чебоксар ола Акимлан у да оҥай вашлиймаш-влакым пӧлекла.

 

---