Финанс грамотлык — тиде окса дене кылдалтше йодышым чын иктешлыме годым кучылталтше шинчымаш. Чаманаш кодеш, финанс грамотлыклан ни йочасадыште, ни школышто огыт туныкто… А такше тыгай тӱҥалтыш шинчымашым йочалан изиж годымак пуаш сай. Лач тыгак ыштеныт 76-шо номеран «Ручеек» йочасадын воспитанникше-влак. Нуно Рублик деке унала миен коштыныт да финанс грамотлыкын тӱҥ умлымашыж дене палыме лийыныт. 

Йоча-влак Рубликын да тудын йолташыже-влакын  тӱрлӧ приключенийышт дене мульткомикс гоч палыме лийыныт. Тудо оксан кушеч тӱҥалтышым налмыж нерген каласкален.  Шинчымашым йоча-влак пират-шамычын заданийыштым ыштыме дене пеҥгыдемденыт.

---